Die X° intrante mense Januario, congregatis omnibus et singulis hominibus de Modiona in ecclesia Sancti Cristofori dicti castri de precepto et mandato venerabilis patris domini Iohannis prioris heremi et Camaldulensis Ordinis generalis et coram eius presentiam constitutis dictus dominus prior, ut ad eum pertinet, volens circa sui novitatem offitii prioratus ad reformationem intendere dicti castri pro bono statu et reformatione ipsius castri et ad pacem et concordiam omnium habitantium in ipso, proposuit, deliberatione habita diligenti, videlicet [36] quod predicti homines absque potestate congrue regi non poterant, eo quod sub alicuius potestatis dominio regentur, qui eos reget et tenet pacifice, in bono statu, pace, concordia et una voluntate. Qui omnes et singuli, audito et intellecto predicti domini prioris proposito, inter se deliberatione prehabita, proposuerunt et voluerunt in omnibus, votis omnibus, dicti domini prioris annuere et sibi in hoc et aliis humiliter obedire tamquam eorum domino atque patri, et sic prefatus dominus prior predictorum fidelium sinceram fidem aspiciens, decrevit eis virum honestum et religiosum conferre, sub cuius potentia possent feliciter respirare. Unde Spiritus Sancti gratia invocata, ad honorem Dei, heremi Camaldulensis et Ordinis generalis et ad bonum statum et concordiam et reformationem dicti castri et inrevocabilem et perpetuam pacem omnium habitantium in ipso, donnum Nicholaum vicecomitem Camaldulensem [37] virum religiosum et honestum, in potestatem et rectorem memorati castri et omnium hominum predictorum elegit usque ad unum annum proximum venturum, assignans eidem vicecomiti et potestati nomine sui salarii C sol. pisanos mon. de consensu et voluntate omnium hominum dicti castri, precipiens et eis quod predicto donno Nicholao per iuramenti vinclo tamquam sibi plenarie et humiliter debeant inobedire. Qui gratanter et omni devotione, qua decuit, fideles predicti predictum domnum Nicholaum in eorum potestatem et domnum admittentes promiserunt eidem et predictum dare salarium et ei corporaliter, tacto libro sanctorum Dei Evangeliorum, in omnibus plenarie obedire.
   Quo prestito iuramento ab omnibus hominibus dicti castri, ordinavit predictus potestas et voluit quod duo sapientes homines de loco predicto eligantur pro consulibus dicti loci. Et sic Brunum et Detaiuti Bonici dictus dominus prior Camaldulensis in consules dicti castri elegit, qui dictum suscipientes officium iuraverunt officium predictum, odio et amore remotis, bene et fideliter gerere, sine fraude.
   Factis itaque et ordinatis consulibus, dictus potestas elegit IIIIor homines de castro predicto, videlicet Bonicum, Brunum et Canti, Aiutum, Testam et Fantonem, qui secundum bonam et laudabilem consuetudinem statutum dicti castri component prout melius videbitur dicto comuni utilius expedire, quod dictum statutum fecerunt et proposuerunt ut infrascripta forma [cont]inetur.